Эхлэл Байгаль орчин Уур амьсгалын ногоон сангаас 175 сая ам.долларын санхүүжилт олгохоор болжээ

Уур амьсгалын ногоон сангаас 175 сая ам.долларын санхүүжилт олгохоор болжээ

130
0

Д.МӨНХ

Уур амьсгалын ногоон сангаас /GCF/ бэлчээрийн менежментийг сайжруулах, хөдөө орон нутгийн эдийн засгийн уур амьсгалд эмзэг байдлыг бууруулах Монгол Улсын Засгийн газрын хүчин чармайлтад дэмжлэг үзүүлэх Азийн хөгжлийн банкны /АХБ/ хөтөлбөрт 175 сая ам.долларын санхүүжилт олгохоор болжээ. Нийт 130 сая ам.долларын хөнгөлөлттэй зээл, 45 сая ам.долларын буцалтгүй тусламжаас бүрдэх Уур амьсгалын ногоон сангийн санхүүжилтийг аймаг, сумдын Ногоон хөгжлийн хөрөнгө оруулалтын 560 сая ам.долларын хөтөлбөрийн хүрээнд олгох юм. Энэхүү хөтөлбөрийг АХБ, Европын Хөрөнгө оруулалтын банк, Европын Холбоо, хувийн хэвшлийнхэн хамтран санхүүжүүлж байгаа бөгөөд тус сангаас Монгол дахь АХБ-ын төсөлд хоёр дахь санхүүжилтээ олгож буй нь энэ юм.
“Бид Уур амьсгалын ногоон сангийн дэмжлэг, хамтын санхүүжилтэд маш их талархаж байна. Бидний түншлэл уур амьсгалын өөрчлөлтийн нөлөөг бууруулах, дасан зохицох үйлсийн төлөө өгсөн АХБ-ны үүрэг амлалтыг улам бэхжүүлж байна” гэж тус банкны Зүүн Азийн асуудал хариуцсан дарга Жеймс Линч мэдэгджээ. “Энэхүү хөтөлбөр нь Монголын бүс нутгийн хөгжлийг тогтворжуулах, Улаанбаатар луу нүүн шилжих үйл явцыг бууруулах, нүүрстөрөгчийг шингээх байгалийн нөөцийг сэргээх замаар манай улсад тулгамдаад буй олон төрлийн сорилтуудыг зохицуулах цогц шийдэл болох юм”. Уур амьсгалын ногоон сан Төлөөлөн удирдах зөвлөлийн 28 дугаар уулзалтынхаа үеэр энэхүү санхүүжилтийг баталжээ. БНСУ-ын Сонгдо хотод төвтэй Уур амьсгалын ногоон сан нь хөгжиж буй орнуудад уур амьсгалын өөрчлөлтөөс үүдэлтэй сорилтуудыг зохицуулахад тусламж үзүүлэх зорилгоор байгуулагдсан бөгөөд 2015 оноос хойш АХБ-ны 11 төсөлд 648 сая ам.долларын санхүүжилт олгохоор шийдвэрлэсэн байна.

LEAVE A REPLY

Please enter your comment!
Please enter your name here