Хиймэл оюуны далд өртөг: Цахилгаан эрчим хүчний шинэ хямрал

Хиймэл оюун ухаан технологийн хамгийн том хувьсгал гэж нэрлэгдэж байгаа ч энэ хувьсгалын “үл үзэгдэх үнэ” нь эрчим хүч болж эхэллээ. Томоохон AI загваруудыг сургах, ажиллуулах дата төвүүд асар их цахилгаан хэрэглэдэг бөгөөд олон улсын эрчим хүчний байгууллагууд үүнийг ирээдүйн том асуудал болно гэж үзэж байна.

International Energy Agency-ийн 2025 оны тайланд дурдсанаар AI төвтэй дата төвүүдийн эрчим хүчний хэрэглээ 2030 он гэхэд хоёр дахин өсөх төлөвтэй байгаа гэнэ. Зарим hyperscale төвүүд 100 мегаваттаас давсан хэрэглээтэй болсон нь дунд хэмжээний хотын хэрэглээтэй дүйцэж буйг судлаачид онцолжээ. 

Өөрөөр хэлбэл, хүмүүс ChatGPT-ээс асуулт асууж, дүрс үүсгэж, видео боловсруулах тусам дэлхий даяар шинэ цахилгаан станцуудын хэрэгцээ нэмэгдэж байна гэсэн үг. АНУ, Ирланд, Нидерланд зэрэг оронд дата төвүүд орон нутгийн цахилгаан сүлжээнд ачаалал өгч эхэлсэн талаар хэд хэдэн судалгаа анхааруулжээ. 

Энд хамгийн сонирхолтой асуудал нь AI-ийн хөгжил технологийн биш, эрчим хүчний өрсөлдөөн болж хувирч эхэлсэн явдал юм. Өмнө нь хэн илүү хүчирхэг чип үйлдвэрлэх вэ гэдэг чухал байсан бол одоо “хэн илүү тогтвортой эрчим хүчтэй байх вэ” гэсэн асуулт гарч ирэв.

Томоохон технологийн компаниуд сэргээгдэх эрчим хүч рүү эрчимтэй шилжиж байгаа ч асуудал тийм амар биш. Нар, салхины эрчим хүч тогтворгүй учир AI дата төвүүд 24 цагийн тасралтгүй хэрэглээг хангахын тулд уламжлалт цахилгаан эх үүсвэрээс хараат хэвээр байна. Үүнээс шалтгаалан зарим улс цөмийн эрчим хүчийг дахин сонирхож эхэлжээ.

Судлаачдын тооцооллоор дата төвүүдийн дэлхийн цахилгаан хэрэглээ ойрын жилүүдэд 1000 тераватт-цагт хүрч болзошгүй байна. Энэ нь Япон улсын жилийн нийт хэрэглээтэй ойролцоо хэмжээ юм. 

Хиймэл оюун ухаан хүний хөдөлмөрийг хөнгөвчлөх ч байгаль орчны дарамтыг нэмэгдүүлэх эрсдэлтэй шинэ эрин эхэлж байгааг эрчим хүчний салбарынхан анхааруулсаар байна.

М.Алтаннар

Эх сурвалж: "Монголын үнэн" сонины №018/24693/ дахь дугаарыг ЭНД-ээс уншина уу.