Холливудын үзэсгэлэнт бүсгүйчүүдийн нэг Меган Фокс

XXI зууны эхэн үеэс Холливудын кино ертөнцөд хүчтэй гарч ирсэн эмэгтэй жүжигчдийн нэг бол Меган Фокс юм. Түүний нэрийг сонссон үзэгчдийн бодолд хамгийн түрүүнд “Transformers” кино,  уг кинонд бүтээсэн дүрээс нь үүдэлтэй түүний хурц агаад өөртөө итгэлтэй дүр төрх буудаг. Гэвч Меган Фоксын амжилтын түүх нь зөвхөн гадаад үзэмж, гоо сайхнаар хязгаарлагдахгүй. Тэрбээр хүүхэд наснаасаа урлагт дурлаж, олон жилийн хөдөлмөр, тууштай байдлын үр дүнд дэлхийн хэмжээний алдартан болж чадсан билээ.Өнөөдөр Меган Фокс нь жүжигчин, загвар өмсөгч төдийгүй орчин үеийн поп соёлын нэгэн бэлгэ тэмдэг болон үнэлэгдэх болсон. Түүний карьер, хувийн амьдрал, олон нийтийн өмнө илэрхийлдэг үзэл бодол нь үргэлж хэвлэл мэдээллийн анхаарлын төвд байдаг.

Хүүхэд нас

Меган Денис Фокс 1986 оны тавдугаар сарын 16-нд АНУ-ын Oak Ridge хотод төрсөн. Түүний бага нас амар байгаагүй. Эцэг эх нь Меганыг бага байхад салж, тэрбээр ээж болон хойд эцгийн хамт өссөн байна. Хүүхэд ахуй үеэсээ урлагт сонирхолтой байсан тэрбээр таван настайгаасаа бүжиг, драмын сургалтад хамрагдаж эхэлжээ.

Өсвөр насандаа тэрбээр загварын тэмцээнүүдэд амжилттай оролцож, хэд хэдэн шагнал хүртсэн нь урлагийн салбарт хөл тавих эхлэл болсон юм. Меган Фокс өөрийн нэгэн ярилцлагадаа “Би тайзан дээр гарахдаа өөрийгөө илүү чөлөөтэй мэдэрдэг байсан” хэмээн дурссан байдаг. Энэ нь түүний жүжиглэх хүсэл мөрөөдлийг улам бататгасан гэж  үздэг.13 настайдаа тэрбээр мэргэжлийн жүжигчний карьераа эхлүүлэхээр гэр бүлийн хамт Лос-Анжелес хот руу нүүсэн нь амьдралынх нь чухал шийдвэрүүдийн нэг байв.

 Кино урлаг дахь гараа 

Меган Фокс 2001 онд Holiday in the Sun кинонд тоглосноор дэлгэцийн урлагт анх хөл тавьсан. Энэхүү бүтээлд тэрбээр туслах дүр бүтээсэн ч өсвөр насны үзэгчдийн анхаарлыг татаж чадсан юм. Үүний дараа телевизийн олон ангит кинонуудад тоглож туршлага хуримтлуулжээ.

Түүний карьерын хамгийн том эргэлт 2007 онд болов. Найруулагч Майкл Бэйн бүтээсэн “Transformers” кинонд Микаэла Бэйнсийн дүрийг бүтээснээр Меган Фокс дэлхийн хэмжээний од болсон юм. Уг кино асар өндөр орлого олж, тухайн оны хамгийн амжилттай бүтээлүүдийн нэгээр нэрлэгдсэн билээ. Кино шүүмжлэгчид түүний жүжиглэлтийг янз бүрээр үнэлж байсан ч үзэгчид Меганыг хүчирхэг, өөртөө итгэлтэй эмэгтэйн дүр төрхөөр нь хүлээн зөвшөөрсөн юм. Үүнээс хойш тэрбээр олон улсын нэр хүнд бүхий хэвлэлүүдийн нүүрэнд гарч, Холливудын хамгийн эрэлттэй жүжигчдийн нэг болжээ. 

Алдар нэр ба сорилтууд 

“Transformers” киноны дараа Меган Фоксын нэр хүнд огцом өссөн. 2009 онд гарсан “Transformers: Revenge of the Fallen” кинонд дахин тоглосноор түүний байр суурь улам бэхэжсэн юм. Энэ үед олон улсын сэтгүүлүүд түүнийг “Дэлхийн хамгийн үзэсгэлэнтэй эмэгтэйчүүдийн нэг” хэмээн нэрлэх болсон.Гэсэн хэдий ч алдар нэрийг дарамт, шүүмжлэл ч дагалддаг. Зарим хэвлэлээр бичихдээ Меган Фоксыг зөвхөн гадаад төрхөөр нь үнэлж байсан нь түүнд сэтгэлзүйн дарамт учруулж байжээ. Тэрбээр нэгэн ярилцлагадаа Холливуд эмэгтэй жүжигчдийг ихэвчлэн гадаад төрхөөр нь хэмждэг тухай ч шүүмжилсэн байдаг.Энэ хугацаанд Меган Фокс хэвлэл мэдээллийн дарамт, хувийн амьдралтай холбоотой асуудлуудтай нүүр тулсан ч карьераа үргэлжлүүлэн авч явж чадсан юм. 

Уран бүтээлийн эрэл 

Меган Фокс зөвхөн экшн киноны жүжигчин биш гэдгээ харуулахыг үргэлж зорьдог байв. Үүний нэг жишээ нь 2009 онд гарсан “Jennifer’s Body” кино юм. Энэхүү бүтээлд тэрбээр аймшгийн төрлийн дүр бүтээсэн бөгөөд хожим кино шүүмжлэгчид үүнийг эмэгтэй төвтэй кино урлагийн онцлох бүтээлийн  нэг хэмээн үнэлсэн байдаг. Мөн тэрбээр “Teenage Mutant Ninja Turtles” болон түүний цуврал бүтээлүүдэд тоглож, арилжааны кино урлаг дахь байр сууриа хадгалж чадсан юм.Сүүлийн жилүүдэд Меган Фокс драм төрлийн уран бүтээлд оролцох сонирхолтой болжээ. Энэ нь түүнийг илүү өргөн хүрээний дүр бүтээхийг зорьдог жүжигчин гэдгийг харуулж байна. 

Хувийн амьдрал ба олон нийтийн анхаарал 

Меган Фоксын хувийн амьдрал үргэлж шар хэвлэлийн гол сэдэв байсаар ирсэн. Тэрбээр жүжигчин Брайан Остин Гринтэй олон жил үерхэж, гэр бүл болсон бөгөөд хэд хэдэн хүүхэдтэй болсон юм. Хосуудын харилцаа олон удаа хэвлэлээр шуугиан тарьж байсан ч тэд хүүхдүүдийнхээ төлөө харилцан хүндэтгэлтэй харилцааг хадгалдаг гэж ярьдаг.

Мөн Меган Фокс хөгжимчин Машин Ган Кэллитэй холбоотойгоор сүүлийн жилүүдэд олон нийтийн анхаарлыг татсан. Тэдний этгээд хэв маяг, улаан хивсний төрх, ярилцлагууд нь сошиал орчинд олны шүүмжлэлийг дагуулдаг.

М.Алтаннар

Эх сурвалж: "Монголын үнэн" сонины №020/24695/ дахь дугаарыг ЭНД-ээс уншаарай.