Хүний тархин дахь микропластик: Орчин үеийн хамгийн түгшүүртэй нээлт

Сүүлийн 10 жилд микропластик далай, агаар, хүнсний сүлжээнд тархсан талаар олон судалгаа гарсан. Харин 2025 онд нийтлэгдсэн хэд хэдэн судалгаа хүний тархинд микропластик хуримтлагдаж байгааг тогтоосноор энэ асуудал эрүүл мэндтэй холбоотой ноцтой сэдэв болов.

Nature Medicine сэтгүүлд нийтлэгдсэн судалгаагаар нас барсан хүмүүсийн тархи, элэг, бөөрөнд микропластик илэрсэн бөгөөд тархинд хамгийн өндөр агууламжтай байжээ. Судлаачид 2016-2024 оны хооронд тархин дахь микропластикийн хэмжээ мэдэгдэхүйц өссөн гэж дүгнэсэн байна. 

Зарим дээжид хэдэн граммтай тэнцэх хэмжээний хуванцар илэрсэн талаар хэвлэлүүд мэдээлсэн нь олон нийтийг цочроов. 

Эрдэмтэд одоогоор микропластик тархины өвчин үүсгэдгийг батлаагүй. Гэхдээ дементэй хүмүүсийн тархинд илүү өндөр агууламж илэрсэн нь анхаарал татаж байгаа юм. Мөн нанопластик нь цус-тархины хамгаалалтын саадыг нэвтрэх боломжтой талаар амьтдын туршилтууд өмнө нь гарч байжээ. 

Үүнтэй зэрэгцэн микропластик уур амьсгалын өөрчлөлтөд хүртэл нөлөөлж болзошгүй гэсэн шинэ судалгаа гарсан. Зарим өнгөт хуванцар нарны дулааныг хүчтэй шингээдэг бөгөөд энэ нь дэлхийн дулааралд хувь нэмэр оруулж байж магадгүй аж. 

Өнөөдөр хүн төрөлхтөн жилд 400 сая тонноос давсан хуванцар үйлдвэрлэж байна. Хуванцар задрахдаа нүдэнд үл үзэгдэх хэмжээний жижиг хэсгүүд болон тархаж, хүнсний ус, агаар, хүний биед нэвтэрч буйг эрдэмтэд анхааруулсаар байгаа юм.

 М.Алтаннар